ҚПК Хатшылығының хабарлауынша, 2025 жылғы 8 тамызда Алматы облысында, Үлкен ауылының маңында, Қазақстан тарихындағы алғашқы атом электр станциясының (АЭС) құрылысы басталғанын білдіретін салтанатты рәсім өтті. Іс-шара барысында болашақ станцияның макеті таныстырылып, инженерлік зерттеулер жүргізу үшін ресейлік тарапқа тапсыруға арналған топырақ үлгілерін алу мақсатында бұрғылау ресми түрде басталды.
«Бүгінгі күн – тек алғашқы қадам, бірақ дәл осы қадам Қазақстанның экономикасында жаңа жоғары технологиялық саланы қалыптастыру жолын айқындайды. Біз АЭС құрылысы заманауи инфрақұрылымнан бастап жаңа мектептер, балабақшалар мен әлеуметтік нысандарға дейін өңірдің дамуына қуатты серпін береді деп сенеміз. Бұл жоба – Қазақстанның стратегиялық таңдауы, өңір мен елдің ұзақ мерзімді экономикалық өсімінің драйвері», – деді ҚР Атом энергиясы агенттігінің басшысы Алмасадам Сатқалиев.
Іс-шарада сонымен қатар, Қазақстандағы алғашқы атом электр станциясын салу бойынша халықаралық консорциумның жетекшісі болып таңдалған «Росатом» компаниясының басшысы Алексей Лихачев сөз сөйледі.
«Мен бүгінгі күн Қазақстан тарихына алтын әріппен жазылады деп сенемін. Біз алаңға шығып, елімізде қуатты, заманауи атом электр станциясын құру сияқты өте шабыттандыратын жобаны іске асыру бойынша нақты жұмыстарды бастаймыз. Инженерлік жұмыстар біздің теориялық болжамдарымызды растауы және атом электр станциясын орналастырудың барлық қыр-сырын — географиялық жағынан да, техникалық шешімдер тұрғысынан да — анықтауы тиіс», – деді Алексей Лихачев.
Бұған дейін, 2024 жылғы 6 қазанда өткен референдумда сайлаушылардың 71,12%-ы (қатысу деңгейі – 63,66%) АЭС құрылысына қолдау білдірген болатын. Бұл жоба энергетикалық қауіпсіздіктің негізгі тірегіне айналады және іске асыру мерзімі қолайлы деп бағаланған. Ресми кестеге сәйкес, бірінші энергоблокты іске қосу 2032 жылдан ерте емес, ал екіншісін – 2035 жылы жоспарланып отыр. Жоба аясында кадрларды даярлау, инженерлік инфрақұрылымды дамыту, ғылыми-білім беру серіктестіктерінің желісін құру көзделген. Жобаны іске асыруға барлық кезеңдерде – экологиялық мониторингтен бастап, сейсмотұрақтылықты бағалау және қоғамдық тыңдауларға дейін – қадағалау жүргізілетіні атап өтілді.
Дереккөздер:
https://www.gov.kz/memleket/entities/atom-energiyasy/press/news/details/1047792
https://forbes.kz/articles/v-ulkene-nachalos-stroitelstvo-pervoy-kazahstanskoy-aes-6847e7/amp